Heb 13 | APZ | STEP | Nakwo Anɨtuye a'amu ne hn'nwi nakwo sɨmeho ne'no unɨngkuhwano.

Hebrews 13

Nakwo Anɨtuye temtitofo hn'nwi sɨmeho unano.

1 Nakwo Anɨtuye a'amu ne hn'nwi nakwo sɨmeho ne'no unɨngkuhwano. 2 Olo hilo so'no inɨngo mofe'eno. A'amu kengoso ango kengo'mta'ango se'mafɨkujo'no sekwo yo'mayo so'no hofɨkimo umokosyohumamno. A'amu fehohnjo ose iwo'nɨngkohofoso hofɨko a'amu ahwomomjo somo yofe mɨhwofe'njo yontɨfi hofiyo umokosyohumamentohofofoho.

3 A'amu Anɨtuye syohomne'no impo'angomo uhumatɨ'mentohofo somne'no sekwo hitoho selofɨhwoso'no tango malokwofoso sekwo fisomapmno. A'amu fehohnjo Anɨtuye yofe'ne osomo a'amu nom'neso wonyo ulohofɨkujo'no hofɨkoe a'apaho tohino umnɨngkuhwoso'no sekwo tohino fisomapmno. Sekwo tohino loso afa'no wasemnono.

4 Ape ma'nyo yahinoso wopɨngofoho. I oso'no hwe sohwo kako kakoe ape'nji yahino wopɨngo'honini uyanjiyoho. U a'amu fihwo oso yahino wopɨngo somo mtɨhupehwosi a'mohufo ihwosi u yo'mayo wonyo ihwosi kifosyoho ihwosi osohumo Anɨtu kako tango uyonefoho.

5 Sekwo hamniyoho engo so'no hi semo'nyo'eno. O'o, yo'mayo mokosyohumalofo so'no sekwoe sɨmeho wopɨngo semo'nɨngkuhwosi hoponoho fihnnɨmno. Hwapɨngoso Anɨtu ole nelalofi, Ngko sekumo mosesɨkwajɨmnehono. Ngko sekumo ne'no sefo'malokweno. Ose nelalofoho. 6 Oso'no nakwo yokumpohn'nyo ito'nɨngkuhwasi nakwo anga'no anga'nohino hn'nwi ole wolano.

Nje Hwe Engo Anɨtu nɨfo'mantofoho.
Ngko iyoho mimnehono.
A'amu hofɨko yo'mayo ngkimo ntohopijo so'no ngko iyoho mannonehoho.
Ose wolano.

Anɨtuye hungkuno lonetɨhwamotofo sohwafe yahinomo tɨfi unɨngkuhwano.

7 Hwe engo sohwa Anɨtuye hungkuno losetɨhwamotofo sohwamne'no inɨngo mofe'eno. Hofɨkoe humayoso ne into'nɨmojo so'no huno syafɨsyɨkuji hofɨkoe yahino so'nji sɨmeho hi'ntnnono uyo so'ntnne tɨfi finomokoho'nawopmno.

8 Jisas Kɨlaisɨye yahinoso hohontajo mta'angoso olohontajo'nji tɨfi no'mjo'ntnneso ito'nohino iwo'nɨngkiso hweho. Kako kakoe huno mɨkwesyafɨsiyo'njo iwo'nɨngkiso hweho. 9 Oseso a'amu yahino kengo kengo'njoso sekwoe sɨmeho somo wonyo semakufitoho. Hofɨkoe hungkunoso losetɨhwafɨkujoso sekumo yokino wesemano lɨkuji ifijoso sekwo Anɨtuye honɨngkanomo nusɨkwajɨpitnnoho. Anɨtuye hitohoso nakumo yokumpohn'nyo wososofitofonesyohumamtonoho. A'amu wosopayo so'no anga'no anga'nohino somo ulo'nyo nto'no feenɨmno. Ose lɨfijoso sekwo haloho upekutoho. O'o, oso yahinoso a'amumo mufo'manehoho.

Anɨtuye sɨmeho wopɨngo umokiyo'ne yo'mayo uyofoho.

10 Nakwo Jisasɨmo sɨmeho hi'ntnnono uyɨwo'nɨngkuhwone hn'nwi nakwoe wonyo wayo'ne kako poyo pe'nɨmentisofoho. I oso'no a'amu Jutaso hohontajo yahino somo inɨngkawentɨfi hofɨkoe wonyo wayo'ne yahu fonjokisasyɨwo'nɨngkohofo osomo Jisas kako mufo'manehoho. Hwapɨngoso Jisas hofɨkoe wonyo nɨhu'nahone wae yaofo'ne pe'nɨmentiso so'no hofɨko sɨmeho hi'ntnnono muyɨwo'nɨngkiyohofofoho. 11 A'amufe wonyo wae syoho'njo hwe engo sohwa hofɨko yahu fonjokisasyontɨfi yahu honɨyo'nohini oso ango Anɨtu humayoponoho mulɨmentohofo somo motahumentohofofoho. Honɨyo loso a'amufe wonyo mpe-e'nefoho. Yahu yokino so'nji mɨkufo so'nji yo'mayoso ango mempo mongkihnta'ni toho nɨwo'nɨngkisofoho. 12 Oso pa'nyo Jisas kakoe a'amu ne imo'nyo'ne tohino engo ma'mentisofoho. Ango Jelusalem mempo hohnta'ni nope'nonto a'amufe wonyo wae nɨhu'nahone yao'mentisofoho. 13 Jisas ose imentiso so'ne nakwo hohontajo honɨngkano hungkuno somo ulɨko'mehwasi Jisasɨmo tɨfi unɨngkuhwano. A'amu kakimo wonyo uloho'mentohofo pa'nyoso wonelohofantɨfeho. 14 Nakwo huno ole nayohoho. Olo hwaho lopo nakwoe hwapɨngo'maho. O'o, nakwo ahwomomjo antɨme nom'ne songo ne'no humayo'ne so'no hontohumalohwono. 15 Nakwo Kɨlaisɨye a'amu'nwoho lɨwo'nɨngkuhwonɨ'ni nakwoe yahino ole, sɨkuno huhwo huhwi engolopohamo nakwo Anɨtuye yofe ho'nomawo'nɨngkuhwono. Yo'mayo ne'maso so'no nakwo Anɨtumo isamoyoka'nohini ulɨwo'nɨngkuhwone'nwoho. 16 A'amu nom'ne somo wopɨngo ulohofontani fo'ma'nɨwo'nɨngkuhwono. Anɨtuye yofe ho'nomayo'ne'nji a'amumo ufo'mayo'ne oso'ntnne'no yo'mayo yahino nakwoe sɨmeho umo lɨwo'nɨngkiso somo monje wesyano. Oso yahino hufa'u sofa'u Anɨtumne'no yaso'manji Anɨtu sɨmeho wopɨngo umokɨmontonoho.

17 A'amu yofe engo'njo Anɨtuye hungkuno losetɨhwalokwofo sohwa hofɨko sekwoe huyo'mango fo'mayo'ne syoho yalokwofo. Oso'no sekwo hofɨkoe hungkunomo haloho popmno. Hofɨkimo enjwa'mo hofiyo fosyohumamno. Hwangku yo'mayo syoho yalokwofo so'no Anɨtu hofɨkimo ulohonɨngkahonɨngkuhwosi hofɨko syoho loso'no ulantɨfeho. Sekwo hofɨkoe hungkunomo hofiyo inɨngkayo so'no u ito'no minɨngkayo so'no ulantɨfeho. Oso'no syoho loso hi semo'nɨngkahonɨngki yalokwofo. Sekwo haloho pekujo'no hofɨko sɨmeho tango muyonehoho. O'o, sɨmeho wopɨngo'njo hofɨkoe syohoso uyantɨfeho. U, hofɨko sɨmeho tango uyo so'manji pipi sefo'mapitnnehofo.

Anɨtu nakumo nefo'mayo'ne jomo ulano.

18 Nakwo ole syofɨsyalokuhwono. Anɨtu nakwoe sɨmehomo nahononteso wopɨngo nehonalofoho. Nakwo kakoe honɨngkano wopɨngo somo engolopohamo nto'no unɨngkohwantane'no yɨhwono. Oso'no sekwo nakumne'no Mpohumo jomo ulɨmno. 19 I olo so'nji Mpohumo jomo ulɨmno. Ngko sekuyepono asomo komo'no se'ma'mne'no jomo ulɨmno.

20 Nakwoe Hwe Engo Jisas kako nope'nɨngkahonɨngki Anɨtu apa'no songo ulɨka'mentisofoho. Jisas kako nakwo Anɨtu'nji nɨhu'nahone mekojɨjwonasiyo'ne kakoe honɨyo usɨhumanto pe'nɨmentiso so'no olohonta kako nakwo kakoe yahusipsip hn'nɨmo nemokosyohumayo'ne Hwe Engo hweho. 21 Oso'no ngko sekumne'no Anɨtumo ole ulalokweno. Anɨtu kako sɨmeho pompenjiyo umokiyo'ne hwapɨngo sohwo kako yo'mayo wopɨngo wosejapmmo lɨhwosi wosejapmmontonoho. Sekwo oso hiso nomafɨkuji Anɨtu sekwo yo'mayo ifitnne'eno lososo hofiyo uyantɨfeho. Oso'nji nom'neso ole jomo ulalokweno. Anɨtuye sɨmeho wopɨngo umokiyo'ne kako Jisas Kɨlaisɨye yokumpohn'nyo'nji sekwoe sɨmehomo syoho yokumpohn'nyo waseloho'montonoho. Oseso kakoe yofe noho'noma'nɨngkuhwasi kakoe yofe engoso engolopohamo ne'no nowentɨhwonefoho. Nehopeho.

Hungkuno ae'uyofoho.

22 U nje a'amufo, olo hungkuno mtɨ'mokalokwe loso tɨfofoho. Oso'no sekwo haloho nto'no popmno. A'amu sekumo atofo losetɨhwentanɨngkuji sekwo tɨmo saho ikutoho. O'o, sekumo yokumpohn'nyo sesosofitofo'nefoho. 23 Nom'ne hungkuno sekwo upa'nɨmno. Nenɨngkwa'wehwo Timouti osohumo hofɨko impo'ango mta'ni nto isɨhutofoma'malofofoho. Kako ngkiyepono we'enepi poso'manji ngko'nji wose'mantayoho.

24 Sekwoe hwe engo sohwanji a'amu hopi'nono Anɨtumo sɨmeho hi'ntnnono uyalokwofo so'njimo ole ulɨmno. Nakwoe a'amu kuyoho selalokuhwono. A'amu oso hwaho Itali lopo Anɨtumo sɨmeho hi'ntnnono uyɨwo'nɨngkohofoso sekumne'no selalokwofo. Nakwoe a'amu kuyoho selalokuhwono.

25 Anɨtuye hitohoso sekwo a'amu hopi'nonohino sokumo wasewo'mtonoho. Hungkuno osohopeho.